top of page
  • Derandein Fundazioa

Kalean bizi diren haurrentzako Sumawe eskola-baratzea abian jartzen dugu


Tanzaniako Karatu barrutian zaurgarritasun handieneko egoeran dauden 5 eta 15 urte bitarteko haurren bizi-baldintzak hobetzeko asmoz, Mwema Street Children Center Karatu (MSCCK), gure tokiko kontraparteak, hainbat jarduera abian jarriko ditu datozen hilabeteetan, elikadura nutritiboa eta osasuna (fisikoa eta mentala) zaintzeko zerbitzuak eskuratzeko aukera emango dietenak kalean lan egiten duten eta bertan bizi diren haurrei.


Alde batetik, Sumawe Eskola Baratzeko Programa abian jarriko da. Programa horrek, haurren elikadura-beharrak asetzeko elikagai nutritiboen ekoizpena ziurtatzeaz gain (MSCCKren nutrizio-programaren iraunkortasunari lagunduz), adingabeen nutrizio-osasunari buruzko beharrezko ezagutzak indartuko ditu. Bestetik, haurren osasun-zerbitzuetarako sarbidea bermatuko da lehen mailako arretan, haien osasuna eta nutrizio-egoera monitorizatzeko. Horren osagarri, jarduera seguruak eta osasungarriak sustatuko dituzten jarduerak egingo dira, adibidez, kirola. Gainera tokiko administrazioei eta komunitateko beste eragile batzuei zuzendutako eragin-ekintzak egingo dira, adingabe horien egoera aztertuko dutenak.


Proiektu honek Kutxa Fundazioaren finantziazioa izango du. Bizi-baldintzak hobetzea da espero den inpaktu nagusia, batez ere Karatu barrutiko kaleko haurren osasun fisiko eta mentala. Kaleko Haurren Errolda eguneratzeak, Gizarte Gaietako Sailarekin batera egingo denak, arreta jaso ez zuten adingabeak identifikatzea eta laguntzea ahalbidetuko du, bereziki neskak.


Barrutiko 100 adingabek gutxienez parte hartuko dute osasunari eta praktika osasungarriei buruzko orientazio-programetan, MSCCKren eskola mugikorraren bidez. Eskola horrek haur horien barrutiko hainbat eremu zeharkatuko ditu; 58 adingabek elikagai nahikoak, seguruak eta elikagarriak eskuratuko dituzte eta osasun-arreta jasoko dute lehen mailako arreta-sistemaren bidez. Gainera, MSCCKren Zentroan zuzeneko laguntza jasotzen dutenen kasuan (zaurgarritasun handieneko 58 adingabe), Sumawe Eskola-Baratzeko Programan parte hartuko dute. Nekazaritzako trebetasun berriak ikasiko dituzte eta bere osasuna eta ingurumena zaintzeaz jabetuko dira.


Espazio horiek dituzten arazoak adierazteko eta helduekin eta beste adingabe batzuekin elkarreragiteko aukera ematen diete. Beste alderdi giltzarri batzuen garrantziaz jabetzeko aukera ere bada, hala nola hezkuntzaz. Batzuek, MSCCKren laguntzarekin, bere ikasketak jarraitzea erabakitzen dute. Gainera, haurrek aktiboki parte hartuko dute komunitate-sentsibilizazioko ekintzen garapenean, beren aldarrikapenetan ahotsa emanez.

Comments


bottom of page