Hilekoaren osasuna giza eskubide gisa: eskola inklusiboetarantz Karatun eta Qurusen (Tanzanian)

Hilekoaren pobrezia dela-eta milaka neskatok Tanzanian duten errealitateaz jabetuta, gure kontraparte Mwema Street Children Center of Karatu zentroak (MSCCK) proiektu integral bat jarri du abian Karatu eta Qurus azpibarrutietan, Arusha eskualdean (Tanzania), Karatu barrutiko Hezkuntza, Gizarte Gai eta Osasun Sailekin lankidetzan.

Helburua argia da: haur eta nerabeak heztea, informatzea eta ahalduntzea, hilekoaren osasuna sustatuz, bai eskolan, bai komunitatean. Proiektua funtsezko hiru ekintza-ildoren inguruan egituratzen da:

-       Hilekoaren higiene-produktu seguruak eta jasangarriak eskuratzeko aukera bermatzea.

-       Hilekoaren osasunari eta higieneari buruzko hezkuntza inklusiboa sustatzea.

-       Komunitatea sentsibilizatzea gizarte-aldaketa sustatzeko eta hilekoaren inguruan dauden estigmak eta tabuak apurtzeko.

2026an zehar, bigarren hezkuntzako lau ikastetxetan lan egingo da, hilekoaren higiene-produktuetarako sarbidea hobetuz eta ikasleei konpresa berrerabilgarriak egiteko prestakuntza emanez. Horrela, jardunbide seguruak eta ingurumena errespetatzen dutenak sustatuko dira. Gainera, hilekoaren osasunean irakasleak eta langile publikoak trebatuko dira, eta sexu- eta ugalketa-osasunari buruzko hezkuntza-programa bat jarriko da abian, bigarren hezkuntzako 1.775 ikasle baino gehiagorentzat.

Azkenik, kanpaina eta jarduera komunitarioak garatuko dira hilekoarekin lotutako estigmak ezabatzeko, gurasoak, tokiko agintariak eta lider komunitarioak aktiboki inplikatuz.

Proiektu hau Basauriko Udalak emandako dirulaguntzari esker egin ahal izango da. Dirulaguntza horri esker, Tanzaniako neskentzako hilekoa duin, informatu eta taburik gabea izateko bidean aurrera egiten jarraituko da.