Etiopian, landa-eremuek erronka handiei egin behar diete aurre nutrizio-produktu nahikoak produzitzeko, bertako lurren kalitatea txarra baita ongarriketarik ezaren eta ura, tresnak eta laborantza-produktuak lortzeko aukera mugatuaren ondorioz. Gainera, klima-aldaketak, pobreziak, gaixotasunek eta lan-merkatuan txertatzeko aukerarik ezak areagotu egiten dute eremu horiek elikaduraren ikuspuntutik seguruak izateko duten zailtasuna.
Testuinguru hori kontuan hartuta, Ethiopian Catholic Church Social and Development Commission Branch Office of Meki tokiko kontraparteak permakulturaren teknikan oinarritutako baratze batzuen proiektu pilotu berritzaile bat kontzeptualizatu zuen, eta 2020ko ekainean amaitu zen. Proiektu hori Kutxa Fundazioak finantzatu du, eta familia onuradunen nutrizio-egoera hainbat arlotako prestakuntzaren bidez hobetzea izan du helburu. Arlo horien artean, permakulturan oinarritutako laborantza, nutrizioa eta elikadura-jardunbideak, diru-sarrera iturri alternatiboak eta ingurumenaren babesa aipa daitezke.
Proiektu pilotua 4 herritan ezarri da, eta zuzeneko onuradunak nekazaritzan esperientzia duten 8 emakume izan dira (8 familia-unitate). Prestatzeaz eta eskuratutako ezagutzak praktikan jartzeaz gain, onuradun bakoitzak beharrezkoak diren materialak eta tresnak, haziak eta beste baliabide batzuk jaso ditu. Halaber, familia-unitate bakoitzak arloko adituen babesa eta aholkularitza teknikoa jaso du.
Proiektuaren emaitzak oso positiboak izan dira, familiei eta haien komunitateari elikagai nutritibo nahikoak eskuratzeko aukera bermatzeaz gain diru-sarrera iturri berriak sortu baititu.